काठमाडौं । चालु आर्थिक वर्षको तीन महिनामा नेपालको व्यापार घाटा सवा चार खर्ब रुपैयाँ पुगेको छ ।

भन्सार विभागले आइतबार सार्वजनिक गरेको आर्थिक वर्ष २०७९/८० को तीन महिनाको अन्तर्राष्ट्रिय व्यापारको तथ्यांकअनुसार असोजसम्मको कुल व्यापार घाटा ४ खर्ब १३ अर्ब ४७ करोड तीन लाख ८६ हजार रुपैयाँ पुगेको छ । जुन चालु आर्थिक वर्षको अघिल्लो (भदौ) महिनाको भन्दा एक खर्ब ४३ अर्ब रुपैयाँले धेरै हो ।

तीन महिनाको अवधिमा नेपालले ५ खर्ब ४३ अर्ब ५७ करोड ६० लाख रुपैयाँ बराबरको कुल अन्तर्राष्ट्रिय व्यापार गरेको थियो । जसमा ४ खर्ब ७८ अर्ब ५२ करोड ३२ लाख २० हजार रुपैयाँ बराबरको वस्तु आयात हुँदा निर्यात भने ६५ अर्ब ५ करोड २८ लाख ३४ हजार रुपैयाँ रह्यो ।

भदौको तुलनामा असोजमा आयात एक खर्ब ६४ अर्बले बढेको र निर्यात २१ अर्बले बढेको हो । भदौमा ३ खर्ब १४ अर्बको वस्तु आयात भएको थियो भने निर्यात ४४ अर्ब ३ करोड बराबरको थियो ।