काठमाण्डौ । नेपालको नयाँ प्रधानमन्त्रीमा नेकपा माओवादी केन्द्रका अध्यक्ष पुष्पकमल दाहाल प्रचण्ड नियुक्त हुनुभएको छ ।

राष्ट्रपति विद्यादेवी भण्डारीले नेपालको संविधानको धारा ७६ को उपधारा (२) बमोजिम माओवादी अध्यक्ष प्रचण्डलाई नेपालको प्रधानमन्त्री पदमा नियुक्त गर्नुभएको राष्ट्रपतिको कार्यालय शितलनिवासले जनाएको छ ।

माओवादी केन्द्रका अध्यक्ष प्रचण्ड नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजबादी पार्टी, जनमत पार्टी, नागरिक उन्मुुक्ति पार्टी र तीन जना स्वतन्त्र सांसदको समर्थनमा तेस्रो पटक प्रधानमन्त्री पदमा नियुक्त हुनुभएको हो ।

नवनियुक्त प्रधानमन्त्री पुष्पकमल दाहाल प्रचण्डलाई भोलि दिउँसो ४ बजे राष्ट्रपति भवन शीतलनिवासमा राष्ट्रपति विद्यादेवी भण्डारीले पद तथा गोपनीयताको शपथ गराउनुहुने कार्यक्रम रहेको राष्ट्रपति कार्यालयका प्रवक्ता सागर आचार्यले जानकारी दिनुभयो ।

नव नियुक्त प्रधानमन्त्री प्रचण्डले यसअघि २०६५ साउनदेखि २०६६ वैशाख २१ गतेसम्म र ०७३ साउन १९ देखि २०७४ जेठ २३ गतेसम्म प्रधानमन्त्रीका रुपमा कार्यभार सम्हाल्नुभएको थियो ।

यस अघि आजै बेलुका ५ बजे भित्र राष्ट्रपति कार्यालय शितलनिवास पुगेर नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रपति विद्यादेवी भण्डारी समक्ष प्रधानमन्त्री पदका लागि दाबी पेश गर्नुभएको थियो ।

राष्ट्रपति समक्ष नयाँ सरकारका लागि दाबी पेश गर्न नेकपा एमालेका अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने, राष्ट्रिय प्रजातन्त्र पार्टीका अध्यक्ष राजेन्द्र लिङ्देन, जनता समाजवादी पार्टीका अध्यक्ष उपेन्द्र यादव, जनमत पार्टीका अध्यक्ष डा सिके राउत लगायतका नेताहरु राष्ट्रपति कार्यालय शितलनिवास पुग्नुभएको थियो ।

यस अघि एमाले अध्यक्ष केपी ओलीको निवास बालकोटमा भएको छलफलमा अध्यक्ष प्रचण्डलाई नेकपा एमालेका ७८, राष्ट्रिय स्वतन्त्र पार्टीका २०, राष्ट्रिय प्रजातन्त्र पार्टीका १४, जनता समाजवादी पार्टीका १२, जनमत पार्टीका ६, नागरिक उन्मुक्ति पार्टीका ४ सांसद सहित कूल १ सय ६६ सांसदको समर्थन जुटेको थियो ।

राष्ट्रपति समक्ष नयाँ सरकारको दाबी पेशगर्ने समय सम्ममा स्वतन्त्र सांसदहरु डा अमरेश कुमार सिंह, प्रभु साह र किरण कुमार साहले पनि समर्थन जनाएपछि माओवादी अध्यक्ष प्रचण्डको पक्षमा कूल १ सय ६९ सांसदको समर्थन जुटेको छ ।

यस अघि सत्तारुढ गठबन्धन बीच सहमति जुट्न नसकेपछि माओवादी केन्द्रका अध्यक्ष पुष्पकमल दाहाल प्रचण्ड बालकोट पुगेर नेकपा एमालेका अध्यक्ष केपी शर्मा ओलीसंग आफ्नो नेतृत्वमा नयाँ सरकार गठनका लागि छलफल चलाएपछि नयाँ गठबन्धन निर्माण भएको थियो ।

बालकोटको छलफल पछि नेकपा एमालेका महासचिव शंकर पोखरेलले पहिलो ठूलो दलले सरकार गठनका लागि दाबी पु¥याउन नसकेपछि दोस्रो दलको हैसियतले निकास दिनका लागि आफुहरुले नयाँ गठबन्धन निर्माण गरेको बताउनु भएको थियो ।

नयाँ सरकार गठनका लागि राष्ट्रपति भण्डारीले दुई वा दुई भन्दा बढी दलको समर्थनमा सरकारको दाबी गर्न आइतवार बेलुका ५ बजे सम्मको समय दिनुभएको थियो ।