२९ साउन, काठमाडौँ । नेपाल सरकारको स्वामित्व रहेको राष्ट्रिय वाणिज्य बैङ्क लिमिटेडले आर्थिक वर्ष २०८२/८३ को चौथो त्रैमासिकसम्ममा ४ अर्ब ५५ करोड ६८ लाख खुद मुनाफा आर्जन गरेको छ ।

बैंकले सार्वजनिक गरेको अपरिष्कृत वित्तीय विवरणअनुसार अघिल्लो आर्थिक वर्षको सोही अवधिको तुलनामा बैङ्कको खुद मुनाफा ६०.६८ प्रतिशतले वृद्धि भएको हो ।

अघिल्लो आर्थिक वर्षको सोही अवधिमा बैङ्कको खुद मुनाफा रु दुई अर्ब ८३ करोड ६० लाख थियो ।

बैंकका प्रमुख कार्यकारी अधिकृत देवेन्द्ररमण खनालका अनुसार कर्जा लगानी र आम्दानीमा भएको उत्साहजनक वृद्धि तथा सम्भावित जोखिमका लागि छुट्याइएको इम्पेयरमेन्ट चार्ज घटेका कारण खुद मुनाफा बढेको हो ।

आर्थिक वर्ष २०८२/८३ मा बैङ्कको खुद ब्याज आम्दानी रु ११ अर्ब ९६ करोड ६१ लाख पुगेको छ । यो रकम अघिल्लो आर्थिक वर्षको तुलनामा १७/८५ प्रतिशतले बढी हो ।

त्यसैगरी बैङ्कको कूल सञ्चालन आम्दानी रु १३ अर्ब १८ करोड ५५ लाखबाट १४।१९ प्रतिशतले बढेर रु १५ अर्ब पाँच करोड ६६ लाख पुगेको प्रमुख कार्यकारी अधिकृत खनालले जानकारी दिनुभयो ।

बैङ्कको खुद सञ्चालन नाफा (करअघिको) ३ अर्ब ९४ करोड २० लाखबाट ६४.२६ प्रतिशतले बढेर ६ अर्ब ४७ करोड ५३ लाख पुगेको छ ।

आर्थिक वर्ष २०८१र८२ मा वितरणयोग्य मुनाफा नरहेकोमा आर्थिक वर्ष २०८२/८३ मा  १ अर्ब ७ करोड ६९ लाख वितरणयोग्य मुनाफा रहेको छ ।

गत असार मसान्तसम्म बैङ्कको कूल समग्र आम्दानी  ३ अर्ब ९० करोड ८९ लाख  रहेको छ । प्रमुख कार्यकारी अधिकृत खनालका अनुसार सोही अवधिमा बैङ्कको कूल निक्षेप ६ खर्ब ८६ अर्ब १३ करोड तथा खुद कर्जा तथा सापट ३ खर्ब ४० अर्ब ३३ करोड पुगेको छ ।

अघिल्लो वर्षको सोही मितिको तुलनामा बैङ्कको निक्षेप ३७.११ प्रतिशत र कर्जा तथा सापट १२.५० प्रतिशतले वृद्धि भएको छ ।

राष्ट्रिय वाणिज्य बैङ्कको २०८३ असार मसान्तसम्म पुँजी कोष अनुपात ११।४० प्रतिशत, कर्जा तथा निक्षेप अनुपात ५०.८७ प्रतिशत र असारको आधारदर ४।२० प्रतिशत रहेको छ । बैङ्कको त्रैमासिक औसत आधार दर ४.२२ प्रतिशत रहेको छ ।

बैंकको निष्क्रिय कर्जा अनुपात (NPA) ३.९५ प्रतिशत, ब्याजदर अन्तर (Spread Rate) ३.३७ प्रतिशत, कोषको लागत दर (Cost of Fund) २.९६ प्रतिशत तथा प्रतिशेयर आम्दानी रु २९.१४ रहेको छ ।

हाल उक्त बैंकले देशका सातै प्रदेशका ७७ वटै जिल्लाबाट वित्तीय सेवा प्रवाह गरिरहेको छ । ग्रामीणदेखि सहरी क्षेत्रसम्म फैलिएको बैंकका ३१६ वटा शाखा कार्यालय, ३३५ वटा एटिएम तथा एक लाख ४८ हजार क्युआर मर्चेन्ट सञ्चालनमा रहेको प्रमुख कार्यकारी अधिकृत खनालले जानकारी दिनुभयो ।

उहाँका अनुसार बैंकले २० लाख ६२ हजार मोबाइल बैङ्किङ प्रयोगकर्तासहित कूल ४८ लाख ७० हजार ग्राहकलाई सेवा प्रदान गरिरहेको छ ।

समयसापेक्ष ग्राहकको माग बमोजिम परिष्कृत सेवा दिइरहेको बैङ्क सबैभन्दा बढी सरकारी कारोबार गर्ने र सबैभन्दा बढी क्युआर मर्चेन्ट कारोबार गर्ने बैंकका रूपमा राष्ट्रियस्तरमा पुरस्कृतसमेत भइसकेको छ ।

प्रमुख कार्यकारी अधिकृत खनालले बैंकले हासिल गरेको उक्त सफलताका लागि उल्लेखनीय योगदान पुर्‍याउने सम्पूर्ण निक्षेपकर्ता, कर्जा ग्राहक, शेयरधनी, नेपाल सरकार, कार्यरत कर्मचारीलगायत समग्र सरोकारवालाप्रति धन्यवाद ज्ञापन गर्नुभएको छ ।

उहाँले आगामी दिनमा अझ गुणस्तरीय सेवा प्रदान गर्दै उत्कृष्ट नतिजा हासिल गर्ने प्रतिबद्धतासमेत व्यक्त गर्नुभयो ।