३० जेठ, काठमाडाैं ।  यो साता लगातार उकालो लागिरहेको नेपाली शेयर बजारकाे परिसूचक नेप्सेमा मंगलवार उच्च अङ्कको वृद्धि भएको छ ।

नेपाल स्टक एक्सचेञ्ज (नेप्से) काे परिसूचक मंगलवार ३४ दशमलव १७ अङ्कले बढेर दुई हजार २० दशमलव ६४ अङ्कमा कायम भएको छ।

यस दिन कारोबार रकम पनि बढेको छ । विभिन्न दुई सय ७० कम्पनीहरूका एक करोड आठ लाख एक हजार छ सय ९३ कित्ता शेयरहरू चार अर्ब १२ करोड ६६ लाख ९६ हजारमा किनबेच   भएका छन् ।

मंगलवारकाे कारोबारमा २२ वटा कम्पनीको मूल्य मात्रै घटेको छ भने अरु सबै कम्पनीको मुल्य बढेको छ । यस दिन नेप्सेका सबै समूहको उपसूचक हरियै भएको छ ।

यस दिन सबैभन्दा धेरै जीवन बीमा समूह दुई सय ७६ दशमलव ६० र निर्जीवन बीमा समूह दुई सय २४ दशमलव ९० अङ्कमा कायम भएको छ ।

बैंकिङ समूह सात दशमलव ३६, विकास बैंक ५८ दशमलव १४, वित्त ३६ दशमलव ९२, होटल तथा पर्यटन एक सय तीन दशमलव ७६, जलविद्युत् ४८ दशमलव ५७ र लगानी समूह एक दशमलव ३६ अङ्कले बढेको छ ।

त्यस्तै, उत्पादन तथा प्रशोधन दुई सय २१ दशमलव ५७, लघुवित्त ९६ दशमलव ७०, म्युचुअल फन्ड शून्य दशमलव १६, व्यापार ६१ दशमलव ५० र अन्य समूह १५ दशमलव ५३ अङ्कले बढेको छ ।

मंगलवार विन नेपाल लघुवित्त वित्तीय संस्था लिमिटेडको शेयर मूल्यमा सकारात्मक सर्किट लागेको छ । सबैभन्दा धेरै गुमाउनेमा भने प्रभु स्मार्ट फन्डको शेयर मूल्यमा प्रतिकित्ता तीन दशमलव ९३ प्रतिशतको गिरावट देखिएको छ ।

कारोबार रकम र कारोबार भएको शेयर सङ्ख्याका आधारमा सबैभन्दा धेरै शिवम् सिमेन्ट लिमिटेडको रू २७ करोड ६६ लाख ८७ हजार दुई सय ५० बराबरको पाँच लाख ५७ हजार तीन सय ८८ कित्ता शेयर किनबेच भएको छ ।