१७ भदौ, काठमाडौं ।  कृषि तथा पशुपक्षी विकास मन्त्री डा वेदुराम भुसालले कृषि क्षेत्रको सबैभन्दा ठूलो सिँचाइको समस्या चाँडो समाधान गर्ने प्रतिबद्धता व्यक्त गर्नुभएको छ ।

मुक्तिनाथ कृषि कम्पनी लिमिटेडले आयोजना गरेको कार्यक्रममा कृषि मन्त्री भुषालले कृषि क्षेत्रमा सबैभन्दा ठूलो समस्याको रुपमा सिँचाइको असुविधा नै रहेको बताउनु भयो ।

मन्त्री भुषालले हालसम्म ४८ प्रतिशत जमिनमा मात्रै सिँचाइ भएको र त्यो पनि बर्खा आसपासमा मात्रै, बाह्रैमास सिँचाइ हुने क्षेत्र भनेको १७÷१८ प्रतिशतभन्दा धेरै नभएको उल्लेख गर्नु भयो ।

उहाँले सबैभन्दा पहिला सिँचाइको व्यवस्थापन गरेपछि मात्रै उन्नतशील बीउको विकास गर्ने, मलको अभाव पूरा गर्ने, यान्त्रिकीकरणमा जाने, बजारको व्यवस्थापन गर्ने र आधुनिकीकरणमा जान सकिने बताउनु भयो ।

राष्ट्रिय योजना आयोगका उपाध्यक्ष डा. मिन बहादुर श्रेष्ठज्यूले सोह्रो पंचवर्षिय योजना निर्माणको अन्तिम चरणमा रहेको सन्दर्भमा यो कार्यक्रम अत्यन्तै फलदायी रहेको र योजनामा सार्वजनिक नीजि सहकारीको साझेदारीको अवधारणालाई योजनामा समेट्ने बताउनुभयो ।

कार्यक्रममा कृषि मन्त्रालयका सचिव गोविन्दप्रसाद शर्मा आचार्यले समग्र कृषि क्षेत्रको विकासका निम्ति नीति र सरकारी क्षेत्रबीच समन्वय र एकता हुनुपर्नेमा जोड दिनुभयो ।

कम्पनीका कार्यकारी अध्यक्ष भरतराज ढकालले कृषि क्षेत्रको विकासका निम्ति सङ्घ, प्रदेश र स्थानीय गरी तीनै तहका सरकार मिलेर अगाडि बढ्नुपर्छ भन्नुभयो ।

कार्यक्रममा कम्पनीले तयार गरेको ५ वर्षे रणनीतिक योजना “भिजन २०८५” अनुसार कृषक, उपभोक्ता, व्यवसायिक साझेदार, सेवाग्राहीहरुलाई देशव्यापी रुपमा उच्चस्तरीय र दीगो सेवा प्रदान गर्ने अभिप्रायले निम्नानुसारका ५ वटा कृषि संरचनाहरुको डिजिटल रुपमा समुद्घाटन गरिएको छ ।

१. इटहरी, बर्दिवास, काठमान्डौ, बुटवल, सुर्खेत र धनगढीमा अवस्थित “प्रादेशिक कार्यालयहरु”
२. स्याङजा र चितवनमा अवस्थित “फार्म उत्कृष्टता केन्द्र”
३. कृषिमा लगानी प्रवद्र्धनका लागि “कृषि व्यवसाय परामर्श केन्द्र”
४. कृषकहरुलाई दैनिक सेवाको लागि “कृषकसंग मुक्तिनाथ कल सेन्टर”
५. आर्टिफिसियल इन्टेलिजेन्समा आधारित “मुक्तिनाथ एप”