२१ असाेज, काठमाडौँ ।  शेयर धितो कर्जाको सीमा बढाउँदा पनि पुँजी बजारका लगानीकर्तामा उत्साह नदेखिएपछि आइतवार नेपाल स्टक एक्सचेञ्ज (नेप्से) काे परिसूचक ३५ दशमलव ६७ अङ्कले घटेको छ ।

परिसूचक एक दशमलव ८२ प्रतिशतले घटेर एक हजार नौ सय २१ दशमलव २४ को बिन्दुमा कायम भएको हो ।

पुँजी बजारका लगानीकर्ताको मनोबल बढाउन भन्दै शेयर धितो कर्जासम्बन्धी व्यवस्था केही खुकुलो बनाइए पनि त्यसको सकारात्मक प्रभाव भने बजारमा देखिएन ।

नेपाल राष्ट्र बैंकले गत बिहीबार बैङ्क तथा वित्तीय संस्थालाई जारी गरिएको एकीकृत निर्देशन २०८० मा संशोधन गर्दै मार्जिन प्रकृतिको शेयर धितो कर्जाको सीमा बढाएको थियो ।

यसअघि शेयर धितो कर्जाका रुपमा समग्र वित्तीय प्रणालीबाट  १२ करोड रूपैया सम्मको मात्रै कर्जा पाउने व्यवस्था थियो । त्यसलाई बढाएर व्यक्तिको हकमा १५ करोड रूपैया र  संस्थाको हकमा  २० करोड रूपैया बनाइएको छ ।

शेयर धितो कर्जाको सीमा बढ्दा त्यसको सकारात्मक प्रभाव बजारमा देखिने अनुमान गरिएको थियो ।

यस दिन दुई सय ८९ कम्पनीको ५८ लाख १५ हजार एक सय ८९ कित्ता शेयर ५९ हजार एक सय ७१ पटक खरिदबिक्री हुँदा  एक अर्ब ८० करोड १७ लाख ६६ हजार दुई सय ९४ बराबरको कारोबार भएको छ ।

आइतवारकाे सबै समूहका उपसूचक घटेका छन् । सबैभन्दा धेरै जलविद्युत् समूह दुई दशमलव ७२ र होटल तथा पर्यटन समूह दुई दशमलव ३५ प्रतिशतले घटेको छन् ।

आइतवारकाे कारोबारमा १६ वटा कम्पनीको शेयर मूल्य मात्रै बढेको छ । सबैभन्दा धेरै बाराही हाइड्रोपावर पब्लिक लिमिटेडको शेयर मूल्य नौ दशमलव ५९ प्रतिशतले बढेको छ । स

बैभन्दा धेरै घट्नेमा भने हिमालयन लघुवित्त वित्तीय संस्था लिमिटेड र गरिमा डिबेन्चर– २०८५ को शेयर मूल्यमा नकारात्मक सर्किट लागेको छ ।

आइतवारकाे कारोबार रकमका आधारमा सबैभन्दा धेरै शिवम् सिमेन्ट लिमिटेडको छ करोड ७३ लाख ८१ हजार पाँच सय ६९ बराबरको शेयर किनबेच भएको छ ।

कारोबार भएका शेयर सङ्ख्याका आधारमा भने सानिमा बैङ्क लिमिटेड प्रमोटर शेयर दुई लाख ५० हजार कित्ता खरिदबिक्री भएको छ ।