महालेखा नियन्त्रक कार्यालयको तथ्याङ्कअनुसार कात्तिक १२ गतेसम्ममा सरकारले २५ अर्ब ७८ करोड ९० लाख रूपैया बराबर पुँजीगत खर्च गरेको छ ।
त्यस्तै गत असोज मसान्तसम्ममा सरकारी ऋणको साँवाब्याज तिर्न ६७ अर्ब ७० करोड ७१ लाख रूपैया खर्च भएको सार्वजनिक ऋण व्यवस्थापन कार्यालयको तथ्याङ्कबाट देखिन्छ ।
यो अवधिमा भएको कुल पुँजीगत खर्चको तुलनामा सरकारी ऋणको साँवाब्याज तिर्न भएको खर्च करिब तीनगुणाले बढी हो ।
सार्वजनिक ऋण व्यवस्थापन कार्यालयले प्रकाशित गरेको असोज मसान्तसम्मको सरकारी ऋणको विवरणअनुसार यो अवधिसम्ममा आन्तरिक ऋणको साँवा ४२ अर्ब ८४ करोड १७ लाख र ब्याज १३ अर्ब ७१ करोड ५० लाख ब्याज गरी कूल ५६ अर्ब ५५ लाख ६७ लाख रूपैया बराबर भुक्तानी भएको छ ।
त्यस्तै, बाह्य ऋणको आठ अर्ब ७० करोड ३६ लाख साँवा र दुई अर्ब ४४ करोड ६८ लाख ब्याज गरी कूल ११ अर्ब १५ करोड चार लाख रूपैया बराबर भुक्तानी भएको छ ।
त्यस्तै चालु आर्थिक वर्षको तीन महिना अवधिमा नेपालले ९७ अर्ब ३१ करोड बराबर आन्तरिक र नौ अर्ब ४७ करोड ८० लाख बाह्य गरी कूल एक खर्ब छ अर्ब ७८ करोड ८० लाख रूपैया बराबर ऋण लिएको छ ।
योसँगै नेपालको कूल सार्वजनिक ऋण २३ खर्ब ५४ अर्ब ५९ करोड ५१ लाख रूपैया पुगेको कार्यालयले जनाएको छ ।
गत असोज मसान्तसम्ममा नेपालले ११ खर्ब ८३ अर्ब ५७ करोड २१ लाख आन्तरिक र ११ खर्ब ७१ अर्ब दुई करोड ३१ लाख रूपैया बाह्य ऋण तिर्न बाँकी देखिएको छ ।
अर्कोतर्फ सरकारको घाटा बजेटको आँकडा पनि बढ्दै गएको छ । हालसम्म कूल तीन खर्ब तीन अर्ब ६५ करोड ३७ लाख बराबर बजेट खर्च हुँदा राजस्व सङ्कलन भने दुई खर्ब ४८ अर्ब २८ करोड ५० लाख बराबर देखिएको छ ।
अर्थात् हालसम्म सरकारको आम्दानीको तुलनामा खर्च रू ५५ अर्ब ६७ करोड बढी छ ।
