बाह्य क्षेत्रमा निक्कै सुधार आएको राष्ट्र बैंकले जनाएको छ। रेमिटेन्सको बढ्दो दर र आयात बढ्न नसकेका कारण बाह्य क्षेत्रमा सुधार आएको हो।
असोजमा १ खर्ब ४८ अर्बको आयात भएको छ। आन्तरिक मन्दीले उपभोग्य वस्तुको मागमा कमी आएकाले आयात बढ्न नसकेको हो।
तीन महिनामा ४ खर्ब ७ अर्ब बराबरको वस्तु आयात भएको छ।
चालु खाता तेस्रो महिना लगातार बचतमा छ। गत असारमा ७२ अर्ब घाटामा रहेकको चालु खाता असोजमा ५९ अर्ब बचतमा पुगेको छ।
शोधनान्तर बचत ९९ अर्ब ७ करोड रुपैयाँ पुगेको छ। विदेशी मुद्राको सञ्चिति पनि निरन्तर उकालो लागेको छ।
असोजसम्म १६ खर्ब ४३ अर्ब रुपैयाँ बराबरको विदेशी मुद्रा सञ्चिति छ।
यो रकम भदौको तुलनामा ४४ अर्ब १९ करोड रुपैयाँले बढी हो। राष्ट्र बैंकका अनुसार अहिलेको सञ्चितिले १२.४ महिनाको वस्तु आयात र १०.३ महिनाको वस्तु तथा सेवा आयात धान्न पुग्छ।
समष्टिगत माग घट्दो दरमा रहेकाले मूल्य वृद्धि केही घटेको छ। भदौमा ८.५ प्रतिशत रहेको महँगीदर असोजमा ७.५ प्रतिशतमा झरेको छ।
यो वर्ष महँगी साढे ६ प्रतिशतमा सीमित राख्ने सरकारको लक्ष्य छ।
