०६ पुष, विराटनगर । प्रधानमन्त्री पुष्पकमल दाहाल ‘प्रचण्ड’ले विराटनगरको विकासका लागि आफु प्रतिबद्ध रहेको बताउनु भएको छ ।
मोरङ व्यापार सङ्घको आयोजनामा विराटनगरमा शुक्रवार देखि शुरु भएको विराट ट्रेड एक्सपोको उद्घाटन गर्नुहुँदै उहाँले गिरिजा प्रसाद कोइरालाको गृह नगर विराटनगरको विकासलाई आफूले उच्च प्राथमिकतामा राखेको बताउनुभयो ।
प्रधानमन्त्री दाहालले कार्गो रेल्वे सेवालाई नियमित बनाउन तथा विराटनगरको चक्रपथ निमार्णमा आफूले पहल गर्ने बताउनुभयो ।
मुलुकको अर्थतन्त्र प्रगति उन्मुख रहेकाले नेपाली जनतालाई निरास बनाउने अभिव्यक्ति कसैले दिन नहुनेमा उहाँले जोड दिनुभयो ।
मुलुकको समृद्धि, सामाजिक न्यायका निम्ति आफूले उल्लेखनीय रुपमा काम गरेको र सरकार अब नयाँ ढङ्गबाट अघि बढ्न लागेको उहाँको भनाइ थियो ।
उहाँले एक वर्षको अथक प्रयासपछि मुलुकको अर्थतन्त्र सही बाटोमा आएको बताउनुभयो ।
नेपाली कांग्रेसका नेता डा शेखर कोइरालाले उद्योगी व्यवसायीलाई साथमा लिएर मुलुकको समृद्धिका लागि अघि बढ्नुपर्ने बताउनुभयो ।
उहाँले निजी क्षेत्रकै कारण विकास भएको विराटनगरको साख जोगाइराख्न विकास निमार्णका योजना कार्यान्वयनमा ल्याउन प्रधानमन्त्रीलाई आग्रह गर्नुभयो ।
कार्यक्रममा विराटनगर महानगरपालिकाका प्रमुख नागेश कोइरालाले मुलुकको आर्थिक विकासका लागि तिनै तहको सरकारबिच सहकार्य आवश्यक रहेको बताउनुभयो ।
मोरङ व्यापार संघका अध्यक्ष नवीन रिजालले स्वदेशी बजार प्रवर्द्धन, कार्गो रेल नियमित सञ्चालन तथा प्रदर्शनी स्थल निर्माण लगायतका योजना विराटनगरमा सञ्चालन गर्न प्रधानमन्त्री समक्ष आग्रह गर्नुभयो ।
