०७ माघ, काठमाडौँ ।  चालु आर्थिक वर्षको छ महिनाकाे अवधिमा मुलुकले करिब सात खर्ब रूपैया बराबरकाे  व्यापार घाटा व्यहोरेको छ ।

भन्सार विभागले सार्वजनिक गरेको तथ्याङ्कअनुसार पुस मसान्तसम्ममा  छ खर्ब ९३ अर्ब १९ करोड ८४ लाख ९२ हजार रूपैया बराबरको व्यापार घाटा भएको छ ।

विभागको तथ्याङ्कअनुसार छ महिनाकाे अवधीमा  नेपालले  आठ खर्ब ४३ अर्ब १३ करोड ४६ लाख ४९ हजार रूपैया बराबरको वैदेशिक व्यापार गरेको छ ।

जसमध्ये  सात खर्ब ६८ अर्ब १६ करोड ६५ लाख ७१ हजार बराबरको आयात र  ७४ अर्ब ९६ करोड ८० लाख ७९ हजार रूपैया बराबरको मात्रै निर्यात भएको छ ।

गत आर्थिक वर्षको पछिल्लो छ महिनाको तुलनामा चालु आवको सोही अवधिमा आयात तीन दशमलव ०९ र निर्यात सात दशमलव २३ प्रतिशतले घटेको छ ।

समग्रमा वैदेशिक व्यापार तीन दशमलव ४७ प्रतिशतले घटेको छ भने व्यापार घाटा दुई दशमलव ६२ प्रतिशतले घटेको छ ।

नेपालले सबैभन्दा धेरै भारतसँग  चार खर्ब २४ अर्ब ४४ करोड ८९ लाख २८ हजार बराबरको व्यापार घाटा व्यहारेको छ ।

भारतसँग उच्च ब्यापार घाटा

छ महिना अवधिमा भारतबाट  चार खर्ब ७४ अर्ब ८९ करोड ४१ लाख बराबरको आयात गर्दा भारतमा भएको निर्यात भने  ५० अर्ब ४४ करोड २२ लाख बराबर मात्रै छ ।

नेपालले उच्च व्यापार घाटा व्यहोरेका मुलुकमा तीन, संयुक्त अरब इमिरेट्स, युक्रेन र मलेसिया क्रमशः दोस्रो, तेस्रो, चौथो र पाँचौँ नम्बरमा छन् ।

पुस मसान्तसम्ममा चीनसँग  एक खर्ब ४५ अर्ब ७९ करोड एक लाख १५ हजार, संयुक्त अरब इमिरेट्ससँग  १२ अर्ब २६ करोड, युक्रेनसँग  नौ अर्ब ९६ करोड र मलेसियासँग  आठ अर्ब ६० करोड बराबर व्यापार घाटा छ ।

नेपालको वैदेशिक व्यापारमा नाफा कमाएका मुलुकको सूचीमा संयुक्त राज्य अमेरिका पहिलो स्थानमा छ ।

अमेरिकासँगकाे व्यापार नाफामा

चालु आवको छ महिनामा नेपालले अमेरिकाबाट  सात अर्ब ६३ करोड ६३ लाख ६६ हजार बराबरको आयात गर्दा आठ अर्ब ३३ करोड ९९ लाख ६७ हजार रूपैया बराबरको निर्यात गरेको छ । अर्थात्  ७० करोड ३६ लाख बराबरको व्यापार नाफा अमेरिकासँग भएको छ ।

पछिल्लो छ महिनामा सबैभन्दा धेरै पेट्रोलियम पदार्थ आयात भएको छ । पुस मसान्तसम्ममा रू ६६ अर्ब ४९ करोड ११ लाख बराबरको डिजेल,  ३३ अर्ब ९१ करोड ९६ लाख बराबरको पेट्रोल, २५ अर्ब ४५ करोड रूपैया बराबरको खाना पकाउने ग्यास आयात भएको भन्सार विभागले उल्लेख गरेकाे छ ।