२४ साउन जेनेभा ।   विश्व व्यापार सङ्गठन (डब्लुटिओ)ले सन् २०२६ का लागि विश्व वस्तु व्यापार वृद्धिदरको पूर्वानुमान घटाएर १.८ प्रतिशतमा झारेको छ । यसअघि सो दर २.५ प्रतिशत हुने अनुमान गरिएको थियो ।

डब्लुटिओले यो गिरावटको प्रमुख कारणको रूपमा अमेरिकाले भन्सार शुल्क वृद्धि गरेको नीतिलाई औंल्याएको छ ।

डब्लुटिओले शुक्रबार सार्वजनिक गरेको पछिल्लो व्यापार पूर्वानुमान अनुसार, हालैका भन्सार परिवर्तनहरूले विश्व व्यापारको समग्र अवस्था कमजोर बनाउने देखिएको छ ।

अमेरिकाले अगस्ट ७ मा लागु गरेको ’पारस्परिक भन्सार दर’ले न केवल अमेरिकाको आयात घटाउने छ, तर साझेदार मुलुकहरूको निर्यातमा समेत गम्भीर असर पार्ने अनुमान गरिएको छ ।

अनुमानले भन्सार नबढाउने अवस्थामा गरिएको २.७ प्रतिशतको वृद्धिदरभन्दा पछिल्लो अनुमान निकै कम रहेको डब्लुटिओले स्पष्ट पारेको छ ।

क्षेत्रगत विश्लेषण अनुसार, एसियाली मुलुक आगामी वर्षमा विश्व व्यापार वृद्धिका मुख्य सकारात्मक चालक बन्ने छ भने उत्तर अमेरिकी क्षेत्र सन् २०२५ र २०२६ दुवै वर्षमा नकारात्मक प्रभाव पार्ने अनुमान गरिएको छ ।