२८ मंसिर, काठमाडौं ।   राष्ट्रिय योजना आयोगले प्रदेश सरकार तथा स्थानीय तहबाट आर्थिक वर्ष २०८३/८४ का लागि संघीय समपूरक अनुदान तथा संघीय विशेष अनुदानअन्तर्गत सञ्चालन गरिने आयोजना र कार्यक्रमका लागि प्रस्ताव माग गरेको छ।

शुक्रबार जारी सूचनाअनुसार सातै प्रदेश सरकार र स्थानीय तहलाई आगामी २०८२ माघभित्र आयोगले सञ्चालनमा ल्याएको विद्युतीय प्रणालीमार्फत प्रस्तावसहितको विवरण पेस गर्न भनिएको हो।

प्रस्ताव पेस गर्दा समपूरक अनुदानसम्बन्धी (पहिलो संशोधन) कार्यविधि, २०८२ र विशेष अनुदानसम्बन्धी (पहिलो संशोधन) कार्यविधि, २०८२’ मा उल्लेखित सर्त तथा प्रक्रिया अनिवार्य पूरा गर्नुपर्नेछ।

सूचनाअनुसार जिम्मेवार पदाधिकारीबाट सर्त पूरा भएको प्रमाणीकरण फाराम भरी पेस गर्नुपर्नेछ। प्रदेशको हकमा सम्बन्धित प्रदेश नीति/योजना आयोगको सिफारिससहित प्रदेश सरकार, मन्त्रिपरिषद् निर्णय आवश्यक पर्ने सूचनामा उल्लेख छ।

आगामी आर्थिक वर्षका लागि यसअघि अनुदान प्राप्त गरी कार्यान्वयनमा गएका र सम्पन्न हुन बाँकी रहेका क्रमागत आयोजनालाई पहिलो प्राथमिकता दिई तत्कालीन कार्यविधिको व्यवस्थाअनुसार प्रस्ताव पेस गर्न आयोगको आग्रह छ।