१० चैत्र, काठमाडौ । उद्योगमा १४ घण्टा लोडसेडिङ गर्दा बजारमा महंगी बढेको उद्योगीहरुले दाबी गर्नु भएको छ ।

नेपाल सिमेन्ट उद्योग संघ, स्टिल्स उत्पादक संघ र नेपाल धागो उत्पादक संघले आइतवार संयुक्त रुपमा पत्रकार सम्मेलन गरेर महंगी बढेको बताएका हुन् ।

स्टिल्स उत्पादक संघका अध्यक्ष शोभाकर न्यौपानेले हाल उद्योगमा घोषित रुपमा १२ घण्टा र अघोषित रुपमा २ घण्टा गरी १४ घण्टा लोडसेडिङ भइरहेको बताउनु भयो ।

नेपाल उद्योग वाणिज्य महासंघका पूर्वअध्यक्ष पशुपति मुरारकाले हिउँदमा २४ घण्टामा १२ घण्टा उद्योग बन्द गर्न नसक्ने बताउनु भयो ।

पत्रकार सम्मेलनमा उद्योगीहरुले लोडसेडिड.का कारण प्रतिकिलो १७ रुपैयाँ ३३ पैसा लागत बढेको र लोडसेडिङबाट मात्रै ९ रुपैयाँ बढी खर्च वृद्धि भएको बताउनु भयो ।